Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

Tamaani suleqatigisat aallussinerisa Nuummi nukappiaqqat pitsaasumik ineriartornerat siuarsarpaa

Tamaani suleqatigisat nukappiaqqat ilisarisimalluarpaat. Nalunngilaat, suut nukappiaqqat unammillernartorsiorfingigaat sunillu piginnaaneqarfeqarnersut. Suliamut tunngasutigut nukittoqutinik, aamma inuttut inooqatigiinnikkullu aallusinermik tunniusseqataasarput kissaatigaallu nukappiaqqat inuuneranni allaanerusumik pitsaasumik pilersitseqataanissartik.

Lokale samarbejdspartneres engagement  fremmer unge drenges positive udvikling i Nuuk

Maja Agathelu Nuummi suliffeqarfeeqqami Qassujaalliisarta tamaani suleqatigisatut inisseqqapput. Ulluinnarni ungdomsklubbemi NUiF-mi ilisarisimalluarneqarput suliffeqarfeeqqamilu sulinerni iikkami niviugattullusooq inissisimasarput, ingerlanermi nukappiaqqanik ikorfartuinissaq kajumissisitsinissarlu pingaarnertut suliassaralugit.

ERSEQQISSAAT

  • Tamaani suleqatigisat fritids- imaluunniit ungdomsklubbimi, nukappiaqqat katersorneqartarfianni sulisarput.
  • Mind Your Own Businessimut nukappiaqqanik katerseqataasarput, tamaani ungdoms- fritidsklubbit aqqutigalugit ilisarisimanninnertik aallaavigalugu.
  • Nukappiaqqat ilisarisimavaat, taakku ulluinaat aamma unammillernartorsiorfii suunersut, taamatuttaaq sunik piginnaaneqarfeqarnersut nalunngilaat.
  • Sulinerit tamaasa peqataasarput ingerlanerlu tamaat nukappiaqqat qanimut malinnaaffigisarlugt.
  • Perorsaanerup tungaatigut ilisimasaminnik tunniusseqataasarput, aamma Mind Your Own Businessimut, venturepilotinut suliffinnullu ikorfartuisunut siunnersiueqataasarput.
  • Pisussat pillugit pilersaarusiornermi taamatuttaaq Mind Your Own Businessimi sammisat pillugit atuarfimmut angerlarsimaffimmullu attaveqartarnermut ikiuuttarput

ULLUINNARNI QANIMUT ATTAVEQARNEQ

Agathe Majalu marlunngornermut qilanaartuaannarput. Ulluinnarnit allaaneruvoq, aamma nukappiaqqat suliffeqarfeeraatiminnik pilersitsinerminni, ineriartorneq aqqusaagaat misigissallugu nuannerlunilu pissanganartarmat. Marlunngorneq tamulugassarsiniarnermik aallartittuaannarpoq – sulinermimi qanermut mamartussaqartariaqarpoq. Tamatuma kingorna aqqutinnaartik atuarlugu, nukkappiaqqat biilinik aqqusaarneqarnissaminnut pisariaqartsisut klubbimut aqqusaartarpaat. Ullumi uagut ilaavugut tamanna nammineq misigiumallugu.

”Nukappiaqqat biileqatigilaartarneri iluartaqaaq, tassami oqaloqatigiilaarnissaq inissaqartinneqartarmat. Qanoq innerat, sapaatip akunnerat qanoq ingerlasimanersoq tusartarpavut tamatumalu immitsinnut atassuteqarnerput nakussassartarpaa”, Agathe oqaluttuarpoq.

Agathemut, nukappiaqqat pingaartorujussuusut malunnarluinnarpoq. Toqqissisimasuuvoq, nukissaqarluartoq isumaliorpaluttorlu, qularnanngitsumillu tamanna suliffeqarfeeqqami sulinermi, silaannarmut pitsaasumik sunniuteqartarpoq.

2019 aallartilaarnerani Mind Your Own Businessip ingerlataani siullermi, Agathe avataaniit malinnaavoq. Mind Your Own Business alapernaaserfigilersimavaa, tassami suliffeqarfeeqqami sulineq nukappiaqqanut pingaarutilerujussuusoq takusinnaangamiuk.

”Ineriartornerup ingerlanerani killissarititaasut ilisimasaqarfigivallaanngilakka, kisianni nalunngilara nukappiaqqat namminneq suliffeqarfeeraatertik aallartittussaagaat. Nukappiaqqat ineriartornerat takusinnaallugu pissanganarsorisimavara. Taamaattumik, ingerlanissaq nutaaq ukiarmi aallartimmat,  NUiF-mi nukappiaqqanut attaveqaataasinnaasoralunga aperineqarama qularsimanngilanga”, Agathe oqaluttuarpoq.

Maja klubbimi NUiF-mi aallarteqqammiinnarluni, tamaani suleqataalersinneqarpoq. Uummaarilluni nukissaqarluarnermigut piumassuseqarluarnermigullu, ingerlaannaq nukappiaqqanut attaveqarluarlerpoq. Tamaani suleqataasutut, klubbimit periarfissanit allaanerusunit, nukappiaqqat ilikkarnerulernissaannut periarfissat takusinnaavai. Ingerlaannaq malugaa, nukappiaqqani ineriartorneq pitsaasoq, aamma suleqatigiinnermi nukappiaqqat,  venturepilotit suliffinniillu ikorfartuisut akornanni nukittuumik ataqatigiittoqalernera.

”Malunnartorujussuuvoq, nukappiaqqat angorusutaat annertunerulersimasut. Namminneq inuttut anguniagalersortalersimapput, soorlu atuarfimmi karakterit pitsaanerulersikkumallugit imaluunniit atuarfiup avataatigut suliffittaarusullutik. Aamma ukkassilluarsinnaanerat pitsaanerulersimavoq, taamaasillutik suliamut sivisunerusumik  aallussilluarsinnaanerulerlutik suliarlu naammassillugu. Namminneq isummaminnik anitsisalersimapput, imminerminnullu unammillernerulersimallutik. Siornatigut immaqa nakuuffigisutut misigisimanngisaraluit, maanna allaanerujussuarmik ingerlalersimapput,” Maja nuannaarluni oqaluttuarpoq.

 

NUKAPPIAQQAT INERIARTORNERAT

Agathep nukappiaqqat ilaat ukiuni arlaqartuni malinnaaffigisimavai takusinnaavaalu, nukappiaqqat suliffeqarfeeraatitaarniarlutik aallarnisaanermik misilittaanerminni nikeriapiloorsimasut.

”Nukappiaqqat inuttut namminertut piginnaasaat ersareqaat, aamma suliffeqarfeeraatiminnik ingerlatsinerulernertik ilutigalugu pikkorinneruleriartornerat takusinnaavarput. Aallartitsiteqqinnissamut qilanaalereerpugut, tassami nukappiaqqat suli arlaqarnerusut tunisassiamik ineriartortitsillutik iluatsitsisinnaaqqullugit,” Agathe oqaluttuarpoq.

Social teambuilding NUiFNukappiaqqat ilaat tunuarsimagaatsiartuusimapput, maannali ammanerulerlutillu nutaanik ilikkagaqarnissaminnut alapernaannerulersimapput. Nukappiaqqat allanut tatiginninnerulersimapput, nutaanik sammisaqarusunnerulerlutik imminnullu tatiginerulersimallutik. Nukappiaqqat eqqissiviinnerusimagaluartut eqqissisimanerulersimapput. Suliffeqarfeeraatiminnik angusaqarluarusunnermikkut kajumissusaat angusaqarluarnerurusussusaallu, septemberimi aallartinnermiit qaammatit ingerlanerini qaffasinnerujartuinnarsimasimasoq, Agathep Majallu naliginnaasumik nalaattarpaat.

Tamaani suleqatigisanik qanimut suleqateqarneq, ingerlanerup iluatsilluarnissaanut pingaarluinnartuuvoq. Taakkumi paasisimanninnerat, ilisimasaat peqataanerallu nukappiaqqat ingerlanerannut pitsaasumik ineriartortitsisumillu siuarsaaqataapput, ataatsimut isigalugu, nukappiaqqat isumassarsiaminnik piviusunngortitsiniarneranni killissarititaasunik pitsaanerpaanik tunniusseqataapput.

Mind Your Own Businessip taamatut suleqatigiinneq qujamasuutigeqaa, siunissamilu Nuummi klubbini suleqataasunik suli arlaqarnerusunik suleqateqalernissartik isumalluarfigalugu.