Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

NUUMMI BUSINESS AWARDS-QARNERANI INUUSUIT AALLARNISAASARTUT PERSUARSIUTIGINEQARTUT

GrønlandsBANKEN suleqatigalugu Mind Your Own Businessip nukappiaqqat suliffeqarfeeqqanit Wenuits aamma Qasujaallisarta, Nuummi nersornaasiilluni festernissamut nalliuttorsiornissamullu qaaqqusimavai.

Unge iværksættere fejres til Business Awards i Nuuk

Arfininngorneq 13. Juni, nukappiaqqat pissangaqalutillu annilaangaqisut GrønlandsBANKEN-p kantiinaanut appakaapput. Qaammatini qulingiluani namminivik suliffeqarfeeraatitik naqqaniit ineriartortereerlugit, dommerinut aallarnisaasartutut inuussutissarsiutilittullu misilittagaqarluartunut, niuernermut isumassarsiaminnik saqqummiussinissaat piffissanngorsimavoq

Septemberimi nukappiaqqat eqimattat marluk, suliffeqarfeeqqat Qasujaallisarta aamma Wenuits arpatsitsinissamik hoodiesinillu ilusilersuinissamik siunertaqartut pilersippaat. Ullumikkut nukappiaqqat takorluukatik pillugit angusaqarsimaqaat, tassami 6. juni Qasujaallisarta siullermeerluni arpatsitsivoq, aammalu Wenuits-p hoodiesinik katersat siulliit amerlanersaat tunisimavaat.

Kimojax-mit isumassarsiutitut saqqummiineq

Kim Jakobsen, aamma Kimojax-tut tusaamaneqartoq, siulliulluni isiginnaartitsivimmik tiguaasuuvoq. Peroriartornermini inuttut inooqatigiinnikkullu avatagiisimini unamminartunik misigisaqartarsimavoq, amigaatigisarsimavaalu ikiortigisinnaasaminik nukittuunik maligassaqarnissaq. Taamatullu peroriartornermini tunuliaqutaa nukappiaqqanut arlaqartunut assingoqaaq.

Inuusuttuulluni Kim-ip timersornerup silarsuaani nukissaq immikkuullarissoq nassaarisimavaa. Tamatuma qamuuna ilukkut kajumissutsip nassaarinissaanut ikiorsimavaa, inuunermini nammineq inuttut anguniakkami sorsuutiginissaannut nukissaqalersillugu. Tamannalu nukissaq nukappiaqqani taakkulu suliffeqarfeeraataanni ilisarisinnaasimavaa. Assullu tupinnanaarpaa, taama sivikitsigisup ingerlanerinnaani nukappiaqqat aallarnisaasartutut taama angusaqartigisimanerat, oqaluttuullugillu, suli angusaqarluarnerungaarsinnaasut, anguniakkaminnik sorsuutiginnittuarunik.

Simon Sethsen, 18-nik ukioqartoq Wenuitsimillu aallarneeqataasoq, oqaluttuarpoq tamanna imminermini ilisarisinnaallugu.

Uanga tassa aatsaat siullermeerlunga suliffeqarfeeqqamik allarneeqatavuunga, pissanganarlunilu nuannerpoq. Taamaattunut peqataanissara takorloorsimanngisaannaraluarpara. Takutitaqarnissannut kajuminnerulersimavunga peqataaneralu peqqutingalugu inerisimanerulersimavunga”, Simon Sethsen oqaluttuarpoq.

Aamma Súsanna Poulsenip, kajumissutsiminik venturepilotiusup aamma oktoberimiilli Qusujaallisartami nukappiaqqanik suleqateqarsimasup, nukappiaqqat pitsaasumik suliaqarneranni ikorfartorneqarnissaat, qanoq pingaaruteqartigisoq misigisimavaa.

Pingaartuuvoq, inuusuttatta aningaasaliiffigisarnissaat, tassami tunniussassaqaqaat, aammami uagut upperinnittut, pisariaqartippaatigut”, Súsanna Poulsen oqaluttuarpoq.

Dommerisut ataatsimiititamit annertuumik nersugaaneq

Dommerisut ataatsimiititamut misilittagaqarluartumut, nukappiaqat niuernermut isumassarsiatik saqqummiuttussaavaat. Dommerisut ataatsimiititami inuttaapput, Christian Keldsen, VisioBOX Consulting-mi aallarneeqataallunilu utoqqaanertut piginneqataasoq, Inooraq Brandt, Orbicon A/S-mi direktøri, kiisalu Anton M. Petersen, aallarnisaasartoq aamma soorlu ilaatigut Tour De Nuuk aamma Sarfaq City Run-mik pilersaarusiortartoq.

Taakku pingasut tamarmik, nukappiaqqat isumassarseriallaqqissusaat sapiissusaallu assut tupinnanaarpaat. Inooraq Brandt-p Wenuits-mit nukappiaqqat nersualaarpai, tassa nutaaliortumik atsiussaannut aamma nioqqutissiaannut pitsaaqisumut. Ateq Wenuits tuluttuumit katitingaavoq ”we are inuits” (uagut tassa inuit), assitarlu ilisarnaataat kalaallit ilisarnaataat atorlugit sanaajuvoq. Nukappiaqqat tujuululiaminnut siunertaraat, inoqatiminnut oqorsaataasinnaasumik tunniussaqarnissaq.

Anton Petersen, nammineq arpannermut sungiussisimalluartup aammalu arpatsitsinermik aaqqissuisarnermut misilittagaqarluartup, tupinnanaaqaa, nukappiaqqat qanoq pikkoritsigalutik arpatsitsinerat. ”Perulluliorneq minnerusoq, timigissarneq annerusoq” oqariartuutingalugu, aamma nukappiaqqat oqariartuutiminnut pitsaaqisumut arpatsitsinerannilu siunertaat pillugit nersorneqaqaat, qularinngilaami, aamma siunissami suli arlaqartunik arpaqataatitsiumaartut.

Soorlu Wenuits-tut nukappiaqqat assitut ilisarnaatertik eqqarsaatigilluarsimaqaat, Qasujaallisarta-mi Q kalaallit qilaataattut ilusilersimavaat tassa nipilersornermi akuttoqatigiissaarisutut aallartitsisarmat. Tamannami aamma pisariaqartarpoq, pingaartumik sivisuumik arpassagaanni.

Christian Keldsen-p nukappiaqqat oqaluttuuppai, suliffeqarfeeraatiminni ilumoortumik tulluusimaarutigisinnaasaminnik pilersitsisimanerarlugit. Ilutigalugu pingaartippaa, inuttut aammalu suliamut tunngasutigut siunnersiueqatigiinnissamik pisariaqartitsinerminni, maanna siunissami atorsinnaasaminnik attaveqaateqalersimanerat.

GrønlandBANKEN-mit inuutissarsiortutut ikorfartuisoq, Peter Fleischer Rex, qaammatini kingullerni qulingiluani, aalajangersimasumik sapaatip akunneranut ullormi ataatsimi nukappiaqqat suleqatigisarsimavai, takusinnaavaalu, qanoq ineriartorsimatiginerat.

Pitsaanerpaat ilaat tassaavoq, suliniutimik iluatsitup naammassinerani nuannaarnerat misigalugu aamma takullugu, ikinngutigiinneq nukittooq akunnerminni pilersissimasaat, aamma sulinerup avataani. Misigisarpara, uannut assut tatiginnilersimanerat – ikorfartortitut ikinngutitullu. Nukappiaqqanik suleqateqarninni, pædagogikki, paasinninneq, nikallujuissuseq tatiginninnerlu pillugit ilikkagaqarsimaqaanga. Ataatsimut anguniagaqarneq immikkuullarissumik ataqatigiilersitsisarpoq”, Peter Fleischer Rex oqaluttuarpoq.