Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

Nukappiaqqat inuusuttut Nuummeersut tujuulunnik nasartalinnik ilusilersuipput arsartitsinissamillu aaqqissuussillutik

Novemberimi nukappiaqqat suliffeqarfeeqqanit nutaanit marlunneersut Nuummi Venture Campimi peqataapput. Tassani niuernermut pilersaarusianik ineriartortitsipput qaammatinilu tullerni sulinissaminnut anguniagassaliorlutik, tassami kajumissutsiminnik suleqataasut venturepilotit aamma suliffeqarfinnit ikorfartuisut suleqatigalugit isumassarsiamik piviusunngortinneri takusussaavaat.

Her kan du læse artiklen på dansk.

Nukappiaqqat inuusuttut 13-it Nuummi suliffeqarfeeqqanik nutaanik marlunnik aallartitsileruttorput. Arfininngorneq 21. november inuusuttut aallarnisaasartut Venture Campimut peqataapput, tassami GrønlandsBANKEN-p inaatimminnut kusanartunut, ullormut nalunaaquttap akunnerini qulingiluani suliffiusussamut qaaqqusimavai.

Nukappiaqqat suliffeqarfeeqqani sulilernissaannut ulloq aallarnerfiuvoq, tassami aappaagu juunip tungaanut sapaatip akunneri tamaasa suleqatigiittassapput. Qanimut suleqatigiit (team) pikkorissut suliffeqarfittut inuussutissarsiutilittut ikorfartuisut suliffeqarfinnit ikorfartueqataasunit sisamaneersut kajumissutsiminnillu suleqataasut venturepilotit, nukappiaqqanut suliamut tunngasutigut siunnersuisassapput aammami taakkuussapput nukappiaqqat qaninnerpaamik siunnersiueqatigalugit suleqatigisassaat.

Timigissarneq aamma ataqatigiinneq

Nukappiaqqat arfinillit inuusuttut klubbiannit NUiF-meersut arsartitsinissamik – nipilersornertalimmik aaqqissuussissapput, tassani timersorneq peqqinnerlu qitiutissallugit. Venture Campimut peqataaneq pissanganarlunilu nuannerpoq, suliffeqarfeeqqamik ineriartortitseqataasoq, 15-nik ukiulik Akaarannguaq oqaluttuarpoq.

“Qaammatini aggersuni qilanaarinerpaasara tassaavoq, arsartitsinissaq arlaatigut nipilersornertaqartussaq,” oqarpoq ilallugulu, aamma tamulugassaqarlunilu imeruersaatissaqarumaarpoq.

“Suliffeqarfittut inuussutissarsiutilittut ikorfartuisunik kajumissutsiminnillu suleqataasunik venturepilotinik suleqateqarneq nuannerpoq. Inussiarnersuupput aamma pissarsiffigisaqaavut,” Akaarannguaq nangilluni oqaluttuarpoq.

Nukappiaqqat ilaat siorna pilersinneqartumit suliffeqarfeeqqamit Qasujaallisarta-meersut kajumissaaralutik oqalugiarmata Venture Camp aallarnerneqarpoq. Tassani nukappiaqqat perulluliorneq minnerusoq timersornerlu annerusoq pilersikkumallugit arpatsitsisimapput.

Ullup ingerlanerani atisanik ilusilersuisartut Bolt Lamar-imeersut, nukappiaqqanut taakkunani suliffeqarfeeqqani marlunneersunut, nioqqutissiassaminnik ineriartortitsinissaannut, suliamut tunngasutigut ilisimasaminnik isummersuipput. Inuusuttunik aallarnisaasartunik, suliaminnik oqaluttuarsinnaasunik naapitaqarneq, nukappiaqqanut ilikkarnaqaaq.

Ilusilersuineq nuannaalersitsisoq

Nukappiaqqat arfineq marluk fritidsklubbimit Inneruulat-neersut, tujuulunnik nasartalinnik ilusilersuillutillu ineriartortitsipput, taakku avatangiisinik mianerinnittuussapput qungujunnartumillu naqitaqarlutik, nuannaalersitsillunilu qungujutsitsisinnaasumik.

“Mind Your Own Business-mi peqataaneq nuannerpoq. Nuannernerpaarli tassaavoq, Venture Campimut peqataaneq. LEGO-t atorlugit suliaqarneq aamma ilisimasaqarluartut naliliisut saanni saqqummiineq nuannerpoq. Nuannerportaaq, kajumissutsiminnik suleqataasunik venturepilotinik suleqateqarneq,” Tulluartoq oqarpoq, taanna tujuulunnik nasartalinnik ilusilersueqataallunilu ineriartortitseqataavoq.

Inuussutissarsiortunit siunnersiueqateqarneq

Nukappiaqqat sapaatip akunneri tamaasa sulifffeqarfinnit ikorfartuisunit GrønlandsBANKEN, Illit Forsikringit Agentur, Royal Greenland aamma INI-meersunik suliffeqarfittut inuussutissarsiutiluttut ikorfartuisunik suleqateqartarput. Taakku siunnersuisarput suliamullu tunngatillugu siunnersiueqatigineqartarlutik, taamaaliorneq nukappiaqqat angorusutaannik angusaqartitsiniarnermut iluaqutaalluartarpoq.

“Nukappiaqqat qanoq aallartitsinerat takussallugu, uannut pingaarnerpaavoq. Naatsorsuutigisimasannit Mind Your Own Business-mi peqataaneq pissanganarnerullunilu nuannerneroqaaq. Maanna anguniakkat piviusorpalaarneruleriatortillugit pissanganarneruleriartuinnarpoq,” Royal Greenland-mit suliffeqarfittut inuussutissarsiutilittut nukappiaqqanut Inneruulaneersunut ikorfartuisoq, Agathe Dahl Thorleifsen oqaluttuarpoq.

Kajumissutsiminnik suleqataasut nukappiaqqanik tapersersuipput

Ullormi suliffiusumi nukappiaqqat aamma venturepilotinik suleqateqarput, taakku suliamut aamma inuttut piginnaasaminnik atuillutik nukappiaqqat angusaqartinniartarpaat. Venture Campimi nukappiaqqat isumassarsiaminnik paarlaasseqatigiissimatillutik, nuannaarnerat takullugu tupinnaannarpoq, Cecilia Olsen-Heilmann oqaluttuarpoq, taanna nukappiaqqanut NUiF-meersunut kajumissutsiminik sulilluni venturepilotiuvoq.

“Nukappiaqqat saqqummiigaangasa allatulluunniit iliuuseqaraangasa, tulluusimaartaqaanga. Ilaatigut oqaasissaarutiivillunga qungujulaannalertarpunga. Soorlumi uanga nammineq meeqqakka,” Cecilia Olsen-Heilmann oqarpoq.

Suliffeqarfittut inuussutissarsiutilittut ikorfartuisut aamma venturepilotit suliaqarnerat nalilerneqarsinnaanngilaq, tassami taakku, suliffeqarfeeqqami nukappiaqqanik ineriartortitseqataallutillu nutaanik ilikkagaqarsinnaanngortitseqataapput.

Ilisimasaqarluartunit naliliisunit nersualaarneqarneq

Nukappiaqqat niuernikkut isumassarsiatik ilisimasaqarluartunut naliliisunut saqqummiuppaat, taakku inuussutissarsiortut tassaapput; Anne Nivíka Grødem Greenlandic Foodlover-mit, Julia K. Olsen ANUA-mit aamma Jens-Jacob Lennert-Sandgreen VisioBOX Consulting-mit.

“Nukappiaqqat siunissamut isiginninnerat, tassanngaannartumillusooq avatagiisinut sunniuteqarpoq, tamanna tupinnaqaaq. Nammineq siunissaq sunnerneqarpat, taava siunniussassaqalersitsisarpoq, taamaattumillu misigisaq assut killitsinnarpoq,” Jens-Jacob Lennert-Sandgreen nukappiaqqat saqqummiinerat assut nersualaarneqartoq, pillugu oqarpoq.

Siunissamut piviusunik pilersaaruteqarlutik anguniagaqarlutillu, maanna nukappiaqqat tujuulunnik nasartalinnik aamma nipilersornertalimmik arsartitsinissamut ineriartortitsillutik suliaqarnertik nangissallugu piareerput. Uagullu siunniussaminnik piviusunngortitsinissaat takussallugu qilanaarpugut.