Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

INUUSUTTUT AALLARNISAASARTUT ARSARTITSIPPUT TUJUULUNNILLU NASARTALINNIK AVATAGIISINUT AJOQUSIINNGITSUMIK SANAANIK ILUSILERSUILLUTIK

Septemberimi nukappiaqqat inuusuttut eqimattat marluusut suliffeqarfeeqqanik Erinarsarta aamma 7ly High pilersitsipput, arsartitsinissamik aamma pinngortitamik sianiginnittumik (økologisk) avatagiisinillu ajoqusiinngitsumik sanaanik tujuulunnik nasartalinnik tuniniaanissamik anguniagaqarlutik. Qaammatini arfineq-pingasuni piareersareerneq, qasseeriaqaluni arsartitsinermik- nipilersornertalimmik aamma tujuulunik narsartalinnik pinngortitamik sianiginnittumik sanaanik sakkortuumik oqariartuutilinnik tuniniaanermik naggaserneqarpoq.

Unge iværksættere i Nuuk afholder fodboldevent og designer miljøvenlige hættetrøjer

Arfininngornerup ullaap tungaa. Nuup timersortarfiata eqqaani biilinut unittarfimmi kanerneq nunngutaaq seqernup aatsereersimavaa. Timersortarfissuaq Nuummi illulianut qanganisaanernut ilaasoq, peqqinnermullu assiliartatut ilisarnaataanerpaatut ittoq, ullumikkut suliffeqarfeeqqat Erinarsarta aamma 7ly High-ip tuniniaanerannut isiginnaartitsiviusuusaarluni tunuliaqutaassaq.

Kissalaartumik tikilluaqqusineq

Matup igalaaminiusup tunuaniipput nukappiaqqat eqimattat ullaarnganiit eqqeersimaaqalutik peqataasunik takuniaasunillu tamanik tikilluaqquseqattaartut. Nerriviit sanileriiaat qaavaniipput tamulugassat imerneqarsinnaasullu peqqissaartumik inissitsiterneqarsimasut.

”Qilanaarnermik, unnuaq sinippianngilanga. Sapaatip akunnera sinnerlugu pissangasimavunga. Unammisaqattaartitsineq kiisami aallartillugu torrassuuvoq,”

Dennis 14-nik ukiulik qilanaarpasissumik qungujulalluni oqaluttuarpoq

Aallussilluarneq, pilerineq aallarnisaanerlu

Inersuaq, nateq linoliu nipituumillu nipilersorneq Erinarsartakkut arsartitsinissaannut sinaakkusiisuupput. Ullormut qiimalluni aallussilluarlunilu peqataanerulersitsinissamut iluaqutaasussaq, unammisitsinermi naliginnaasumik ukiut malillugit killilersuineq suiaassutsikkullu agguataarineq  ersinngillat. Inuusuttummi aallarnisaasartut kissaatigaat, tamat inissaqartinnissaat, tassalu atuarfimmit klassit, fritidsklubbit, 7ly High aamma Erinarsarta iligiinnik peqataasitsipput. Kingullermi peqataasimasup suliffeqarfeeqqap Qasujaallisartap klubbiminnit iligiinnik peqataasitsipput, tamannalu nukappiaqqanut arlaqartunut pisartuni kingullerni peqataasimasunut takoqqinnermik nuannersumik kinguneqartitsivoq. Aamma suliffeqarfittut ikorfartuisoq GrønlandsBANKEN nammineq iligiinnik allaffimmiunik peqataasitsivoq, taakku erniinnaq atserneqarput ”Old boys”. Unamminerit pikkunartumik, kisianni ilutigalugu ataqqinillunilu akuersaartumik ingerlanneqartarput. Pingaartumik nukappiaqqat inuusuttut isiginnaartunit qiimmattaatigineqartaqisumik periartuusaaraangasa.

Tujuuluk nasartalik allaanerusoq

Arfininngornermi tullermi anori nillerpoq, Brugsenip saani inissaqarluartumi, aput ilaatigut masannaqisoq, natersuartulllusooq illuni tussimavoq. Arpannissarsuaq ”Maji Nuan” inuppassuarnit arpannnermik nuannarisaqartunit ussagarneqarsimavoq. Nukappiaqqat 7ly High-meersut hoodiesit pinngortitamik sianiginnilluni sanaat pilerisaarutiginissaannut tuniniarnissaannullu, ulloq taanna periarfissatsialaasoq takusimavaat.

Inuit nuannaartut tamulugassanillu tuniniaanerit akornanni tujuuluk nasartalik allaanerussuteqarpoq. Atortumik pilerinartumik sanaap aamma Kalaallit Nunaanik ilisarnaatillip, tujuluup nasartallip qernertup sakiaa kusassarpaa. Suluit qaqortut angisuut Kalaallit Nunaat ungalusimavaat, qutsinnerusumik angusaqarnissamut piareersimaneq takutinniarlugulusooq. Tunuarsimaarneq qaqisunik iluarisaqannginneq (jantelov) tassani tujuulummi nasartalimmi takussaanngillat, tamannalumi inuusuttunit 7ly High-neersunit nuannerlunilu ersarissumik oqariartuutaavoq. Tujuuluk nasartalik avatagiisinik sianiginnilluni bomuldimik sanaajuvoq, taamaasilluni piujuartitsinissamik eqqarsarneq aamma siunissaq nukappiaqqat kissaatigisaat, isumaqatigilluinnarlugit.

Oqariartuut sakkortooq

Anguteeqqap 7ly High-meersup ulloq nuannaarutigaa aamma anillu hoodiesinik takutitaqarnissaq immaqalu aamma tunisaqalaarsinnaanissaq.

” Qaammatini arfineq-pingasuni una pillugu sulisimavugut. Suliaq annertusimaqaaq. 7ly High isumaqarpoq qutsinnerusumi timmissasugut, oqinnerusutut misigaluta ajornartorsiutinit, soorlu Kalaallit Nunaanni misigineqartartunit aniguilluta. Tujuuluit aamma pinngortitamik sianiginnittumik sanaajussapput, tassami pinngortitaq paarerusupparput,” Anguteeraq 17-nik ukiulik tulluusimaarluni oqaluttuarpoq.  

Ulloq naammat, inuit amerlasuut 7ly High-ip tuniniaavia saneqqussimavaat, alapernaatsumillu tujuluit nasartallit, ilisarnaataanullu isumaliutit pillugit apersortarsimallutik aamma arlaqartut tujuulummik taamaattumik peqartariaqarnerarput, tujuulummik nunagisamut tulluusimaruteqarnermik aamma ajornartorsiutit aningorneqarsinnaanerannik ersersitsisumik .