Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

Nuummi Business Awards-eqarnerani inuusuttut aallarnisaasut nalliuttorsiutigineqarput

Suliffeqarfeeqqat marluk Nuummeersut, Erinarsarta aamma 7ly High, arsartitsinermik aaqqissuussinermik aamma avatangiisinik mianerinnittunik tujuulunnik nasartalinnik tuniniaanissamik anguniakkaminnik angusaqarsimanerat pillugu arfininngormat Nuummi inuussutissarsiortunit nalliuttorsiutigineqarput.

Unge iværksættere fejres til Business Awards i Nuuk

GrønlandsBANKEN-ip kantiinaani angisuumi kusanartumilu ballonit guldit atorlugit isaariaq kusassarneqarsimavoq. Natersuaq aappaluttoq takisooq suliffeqarfeeqqameersut aqqutigisassaata saniani issiaviit iliorarneqarsimapput.

Inuusuttut atugarliortut ingerlallualerput  

Oqaluttarfimmut sassartoq siulleq tassaavoq rappertartoq kajumissisitsillunilu oqalugiartartoq Kim Jakobsen, aamma Kimojax-itut ilisimaneqartoq. Kimojax alliartornermini tapersersorneqarpallaarani peroriartorsimavoq. Nuanniitsunit nukillaarsarneqarani sunnerneqarumananilu Kim-ip takorluukkami angunissaanik anguniagaqarluaannarsimavoq. Taamaaliornermigut meeraallunili USA-mukarluni erinarsugassiaminik tusarnaartitsinissaminik takorluukkani piviusunngortissimavaa. Nukappiaqqat kajumissaarpai takorluukkatik anguniartuassagaat, erseqqissarluguli aamma inuit eqqanniittut tassaasarmata aamma illit sunnertiffigisartakkatit.

Inunnik qiimmassaasunik pitsaasumillu kajumissaarisunik nassaarit. Taava angusaqarluassaqqaarputit. Ikinngutitit takutikkit, taava siunissat takutissavara, ” taama oqarpoq isumassarsititsiuartoq Kimojax.

Suliffeqarfeeqqat saqqummiinerat 

Erinarsarta-meersut aamma 7ly High-imeersut isumassarsiniarnerminnit tunisaminnut siullermut qanoq pisimanertik oqaluttuaralugu saqqummiipput. 7ly High-ip Nuummi Illorsuarmi Timersortarfimmi, Nuup qeqqani, Nuuk Centerimi Facebookilu aqqutigalugu tuniniaanerminni piffissaq sivikitsoq atorlugu tujuuluit nasartallit tamaasa tunisimavai. Tujuuluit avatangiisinik mianerinnittuuneri pillugit nukappiaqqat pappiaqqamik agguaanerisa kingorna tujuuluit soqutigineqarlualerput.

Aallaqqaammut tujuuluit soqutigineqarpianngikkaluarput, pappiaqqanilli agguaalluta sunik suliaqarsimanerput oqaluttuareriaratsigu inuppassuit pisipput,” taama tulluusimaarluni oqaluttuarpoq 7ly High-imeersoq Anguteeraq O.

Erinarsarta-meersut timersornerup nuannissusianik oqaluttuarput kikkulluunniillu qanorluunniit ukioqaraluarunik aggerlutik arsariarfigisinnaasaannik nipilersuutinillu nuannersunik tusarnaarfigisinnaasaannik aaqqissuusserusussimanertik oqaluttuaraat.

Inunnik taama amerlatigisunik takulluni nuanneqaaq, inersimasut meeqqallu. Arsartut ilaat meeraarannguupput qiimanerallu nuanneqaaq. Tassa aaqqissuussinitsinni anguniagarput. Kikkut tamarmik aalanerulissapput, computererpallaaratik ataatsimoornerullutillu,” Erinarsarta-meersoq Qaamasunnguaq taama oqaluttuarpoq.

Suliffeqarfimmit ikorfartueqataasup Royal Greenlandimeersup Agathe Dahl Thorleifsen-ip nukappiaqqat 7ly High-imeersut sapaatip akunneranut ataasiarluni qaammatini kingullerni qulingiluani suleqatigivai, takusinnaavaalu nukappiaqqat qanoq ineriartorsimatiginersut.

Nukappiaqqat ineriartornerat akisussaaffimmillu tigusisalernerat takullugu assorsuaq nuannerpoq. Tulluusimaarnerat takusinnaallugu, suliaminnillu angusaminnillu saqqummiinerminni imminnut ikioqatigiinnerat killitsinnartorujussuuvoq,” Agathe oqaluttuarpoq.

Naliliisartoqatigiit alutorsarput

Nukappiaqqat niuernermik isumassarsiaminnik saqqummiiffigisaat naliliisartuupput misilittagartuut.

Naliliisartut tassaapput Inooraq Brandt, WSP Arctic-imi pisortaq, Anne Nivíka Grødem, Sermersooq Business-imi Business Development Manager-i aamma David Røgilds, grafikeri atisanillu meqqimi BIBI CHEMNITZ-imi piginneqataasoq.

Anne Nivíka Grødem ukiut aqqaneq aappassaanni aallarnisaasuuvoq, aallarnisaasuunermigullu ilikkagaasa ilagaat, iluatsitsilluassagaanni kajumissuseqarluassagaannilu ilungersorneq, sapiissuseqarneq, tunniutiinnartannginneq suleqatinillu suleqateqarluarnissaq pisariaqartoq.

David Røgilds-ip maluginiarsimavaa nukappiaqqat imminnut ikioqatigiillaqqissut, pingaartumillu 7ly High-imeersut ilisarisimallualerpai. Nukappiaqqat piumassuseqarnerat alutorisimavaa atiminnilu 7-imik atuinerat taamaalillutillu piujuartitsinermik eqqarsaateqarnerat alutoraa, ”tassa aatsaat”, taama naggasiivoq.

Inooraq Brandt-ip suliffeqarfeeqqameersut ilungersuuteqarnerat pillugu nersualaartorujussuuai,

Niuernermik ingerlataqaraanni naammassisutut misigineq ajornartarpoq. Siullermeernermi aamma ilaatigut iluatsitsinngitsoortoqartarpoq, ilissili ataatsimoorlusi suleqatigiilluarsimavusi.” Inooraq Brandt oqaluttuarpoq nangillunilu ”nuannisaqatigiippusi piffissamilu sivisuumi angusaqarniarnissinni tamanna pingaarutilerujussuuvoq.”

Oqaaseqaatit Kimojax-ip oqaasiinut tunngatillugit naggaserneqarput,

”Soorlu Kim oqartoq, iluatsinnissaanut piffissaq sivisuujusinnaavoq, ilissitulli ataatsimoorluni suleqatigiinnikkut angusaqarluartoqarsinnaavoq. Immissinnut naammagisimaarsinnaavusi.”

Ulloq naggaserlugu nukappiaqqat immikkut tamaasa pillugit suliffeqarfimmit ikorfartueqataasunit venturepilotitullu suleqataasunit tissinartunik, pikkunartunik qiimmaallannartunillu oqaaseqartoqarpoq.