BYD VELKOMMEN TIL MIND YOUR OWN BUSINESS’ NYE ADVISORY BOARD GRØNLAND
Kalaallit Nunaanni siunnersuinermut siulersuisut nutaat ilisaritissinnaangatsigit nuannaarutigaarput, taakku Kalaallit Nunaanni inuussutissarsiornikkut peqatigiiffinnilu (organisationer) misilittakkaminnik paasisimasaminnillu tunniussissapput. Siulersuisut Kalaallit Nunaanni aallarnisaanermik suliaqarnermut nukappiaqqanik peqataalersitsiniarnitsinni, periarfissanik nutaanik atorsinnaasatsinnik takunnissinnaaqquulluta tapersersussavaatigut.
Siulersuisuni (boardet) aallartitat taakku arfineq-marluk ataatsimoorussaat tassavoq, Mind Your Own Businessip periusaata nukappiaqqallu ilimaanaateqarfigisinnaasaasa upperinerat. Københavnimi MYOB-ip allaffiani naapillutik, naleqqiussinertik isumassarsiatillu pillugit paarlaasseqatigiissapput. Siulersuisut tassaapput inuit piginnaasaqarluartut suliamut assigiinngitsunik pikkoriffillit, taamaasillutik taakku naleqqiussineri kattullugit uagut suliatsinnut isummersuutaasinnaaqqullugit.
Mikael Thinghuss Royal Greenlandimi ingerlatsinermut direktøriuvoq. Sulinermigut ingerlalluarnermini aamma IDdesign-mi ingerlatsinermut direktøriusimavoq ECCO-milu ingerlatsinermut tullersortitut direktøriusimalluni. Aallarnisaaniartarnermut anersaanissimaartarnermullu tapersersuiniarpoq, taamaattumillu siulersuisunut ilaanissaq akuerisimallugu.
”MYOB-ip nukappiaqqat piginnaasaannik ineriartortitsinissamik imminerlu ineriartornerup akisussaaffigalugulu iluatsilluarnissaanik pingaartitsinermigut pingaaruteqarluinnartumik eqquivoq, Royal Greenlandimut uanullu inuttut, isumaqarluinnarlunilu paasinarluinnartumik. Nukappiararpassuaqarpormi nukissaqartunik, isumassarsiullaqqissunik ilimanaateqarfeqartunillu, iluarsartuussamik akuersaartumillu ingerlariaaseqartumik ikiorneqarnikkut uummarissisinneqarsinnaasunik,” Mikael Thinghuus oqarpoq.
Mette Holm aviisiliortuuvoq atuakkiortuullunilu pingaartumillu ineriartorneq inuttullu pisinnaatitaaffiit suliaralugit. Kalaallit Nunaata ilarujussuanut tikeraartarsimavoq, nunamilu inuit, suliffiit atorfeqarfiillu assigiinngitsorpassuit naapittarsimallugit.
” MYOB aallarniiniarneruvoq pitsaalluinnartoq – naak inuunermi ajornartorsiorfiusumik aallartissimagaluartuni ataasiakkaani nukinnik pitsaasunik atuilersitsiniarnermut, tatiginnilersitsiniarnermut siunissamullu upperinnilersitsiniarnermut. Kalaallit Nunaanni MYOB suliassaaleqissanngeqaaq, uangalu nuannaarutigalugulu tulluusimaarutigaara MYOB-mi Kalaallit Nunaanni siunnersuinermut siulersuisunut ilaanera. Uannullu ersarilluinnarpoq, arlaatigut Kalaallit Nunaanni MYOB-mut atuisunullu inuusuttunut, tapersersueqataallungalu nukittorsaaqataasinnaaguma nuannaarlunga taamaaliorusulluinnarnera,” Mette Holm isumaqarpoq.
Thomas Trier Hansen eqqartuussissuserisuuvoq soorlu ilaatigut inuit pisinnaatitaaffiinik aamma CSR immikkut sammisaqarsimasoq. Kalaallit Nunaanni eqqartuussivimmi eqqartuussisuusimavoq aammalu inatsisitigut siunnersorneqartarfimmi IKIU-mi siulittaasuusimalluni. 2002-mi siullerpaamik Kalaallit Nunaannut tikeraarsimavoq, kingornalu ukiuni arlalinni 2011-p tungaanut tamaani najugaqarsimalluni.
”Inuusuit kalaallit annertoorujussuarmik ilimanaateqarfeqarput, inukittunnguuneralu pissutigalugu Kalaallit Nunaata isumalluutigisinnaasani tamaasa iluaqutigisariaqarpai. MYOB-llu nukappiaqqat inuusuit Kalaallit Nunaanni siuariartortumi tunuliaqutaasut apeqqutaatinnagit peqataanissaannut periarfissippiarpai,” oqarpoq.
Nanna Bang Tuborgfondet-mi pilersaarusiornermut pisortatullu tullersortaavoq. Allannguiniarnermut ineriartortitsinermullu suliniutini annertunerusuni kiisalu inuiaqatigiinni inuinnarni iluarsartuussinermut suliffeqarfiillu akornanni piginneqatigiinnermi pilersaarusiornernut misilittagaqarpoq. Siulersuisunut peqataanissani akuersaarsimavaa, inuusuit suliffeqarfeeqqamik aallartitsiniarneranni nukittorsarlugit tapersersueqataaffigerusullugit.
”Isumaqarpunga MYOB-ip Kalaallit Nunaanni aallartitsinera tupinnaannartuusoq, qularinngilaralu ataatsimooqatigiinnik ineriartortitisinermut pitsaasumik isiginneriaasseqarneq inuusuillu akornanni aallarniiniarnerit pingaarutilinnik kinguneqartitsiumaartut, inuusuttunut, inuussutissarsiornermut inuiaqatigiinnullu naliginnaanerusumik sunniuteqarluartussamik,” Nanna Bang isumaqarpoq.
Miki Jensen nipilersortartoq nuannarineqarluartunilu rockimik nipilersoqatigiinni kalaallini Small Time Giantsini erinarsortartoq. Nipilersoqatigiit Kalaallit Nunaata kujataani Qaqortumi 2005-mi pilersinneqarput, nipilersoqatigiilli peqatigalugit kingusinnerusukkut Danmarkimut nuussimalluni. Miki Jensen siulersuisuni peqataanermini naleqqiussisinnaanermigut Kalaallit Nunaanni aallarnisaanermut inuusuttunik peqataalersitseqataasinnaavoq.
Lykke Geisler Yakaboylu Sila greenland DMC-mik tunngaviliisuullunilu direktøriuvoq, tassani Kalaallit Nunaannut angalanissat ilusilersorneqartarput. Siusinnerusukkut ukiut 20-t ingerlanerini Visit Greenlandimi sulisimanermigut nunami nunallu assigiinngitsut akornanni annertoorujussuamik attaveqaateqalersitsisimavoq. Kalaallit Nunaannilu pingaartumik ilisarsaanermik (branding) pilerisaarinermillu suliaqarsimalluni.
”MYOB nammineq piumassuseqarnissamik tunngaveqarpoq – tassa nukappiaqqat inuusuit suleqataasussallu eqqarsaatingalugit. Tamannalu iluatsitsisinnaanermut ammaassutaasinnaasutut isumaqarfingaara, ilutigalugu upperalugu, inuusuit pitsaasumik ineriartortitsinissamut isumalluarfissaasut inuusuttunut Kalaallit Nunaannilu inuiaqatigiinnut iluaqutaasussamik. Tamannalu ineriartorneq pilersitseqataaffigerusuppara,” oqarpoq.
Mads Lumholt Visit Greenland-mi tuniniaavimmik misissuinermut qitiutitaqartumi utoqqaanertut siunnersortaavoq (seniorkonsulent). 2010-mi CSR Greenland suleqatigalugu ulloq saliiffissaq Saligaatsoq aallarneeqataaffigisimavaa. Misilittagaqarfigaattaaq Foreningen Grønlandske Børn-mut katersuiniartitsilluni tusarnaartitsinernik aaqqissuussineq, taamatullu sulisimalluni.
”Kalaallit Nunaanni inuusuttunut unamminarnerpaat ilagaat inuttut inooqatigiinnikkullu ajornartorsiutaasut atuarfeqarfiullu iluani amingartumik ataqatigiissaarisimanerup ataqatigiissinnissaat, taamaattumik MYOB-p suliniutaatut ittoq, inuusuttuni inuttut inooqatigiinnermilu aammalu ilinniagaqarnikkut unamminartorsiorsinnaasuni allaanerusumik qinigassaqarnissamik periarfissaqalersitsissaaq, immineq piginnaasat namminerlu aallarnisaasutut suliaqarnerup iluatsilluarsinnaanera upperinerulersinnaaqqullugit. MYOB-p Danmarkimi naleqarluinnarnini maannamut takutereerpaa, taamaattumik Kalaallit Nunaanni suliaqarnerup tapersersornissaa nalilerujussuuvoq” Mads Lumholt oqarpoq.
Tulluusimaarutingaarput Kalaallit Nunaanni siunnersuinermut siulersuisunut (Advisory Board Grønland) nutaanut aallartitat arfineq-marluk tikilluaqqusinnaagatsigit. Ilisimasanik misilittakkanillu avitseqatigiinnitsigut, aallarnisaanermik suliaqarnermi nukappiaqqat suliamut tunngasutigut aammalu inuttut inooqatigiinnikkullu piginnaasatigut ineriartortitsisinnaaqqullugit, killiliussassat pitsaanerpaat pilersissinnaavagut.
