You are currently viewing KAJUMISSUTSIMINNIK SULISUT FACILITATIONSBOOSTER-IMI PIKKORISSARPUT

KAJUMISSUTSIMINNIK SULISUT FACILITATIONSBOOSTER-IMI PIKKORISSARPUT

Frivillige får styrket deres faglighed til facilitationbooster

Suliffeqarfimmit ikorfatueqataasut, kajumissutsimik venturepilotitut suleqataasut, Mind Your Own Business – Kalaallit Nunaat-nilu illoqarfimmi suleqatigisat pikkorissarnermut FacilitationsBooster-imik taasamut peqataaqqammerput. Taamaalillutik suliffeqarfeeqqami suliaqarnerup unikaallatsilaarnissaanut kajumissutsiminnik suliaqartut periarfissaqarput. Siunnersorteqarfik GREATTALKS suleqatigalugu nukappiaqqat ineriartornissaannut suliffeqarfeeqqamillu suliaqarnerminnut pitsaanerusumik sinaakkusiinissaminnut peqataasut periarfissinneqarput.

Kajumissutsiminnik venturepilotitut suleqataasut, suliffeqarfimmit ikorfatueqataasut illoqarfimmilu suleqatigisat suliffeqarfeeqqamit Kaassassuk-meersut Nuummi GrønlandsBANKEN-imi inimi kusanartumi inissitsitileruttorput. Erngiinnannguaq workshoppimut nalunaaquttap akunnerinik pingasunik sivisussuseqartumi peqataassapput, suliffeqarfeeqqami suleqatigiilluarnissaq pingaarnertut sammisussaallugu.

Siunnersorteqarfik GREATTALKS peqatigalugu nammineq kajumissutsiminnik suliaqartut periarfissaqarput eqqarsaatigissallugu, assersuutigalugu suliap ingerlasarnerata pilersaarusiornissaata pingaassusia, kikkut sunik suliaqarnissaat, suliassat nukappiaqqanut naleqqussarnissaat, namminerlu aqutsisutut ineriartortitsisutullu suliaqarnermut pikkorinnerulernissaq.

FACILITATIONBOOSTER-IMI KAJUMISSUTSIMINNIK SULISUT SULERIAATSITIK PITSANNGORSARPAAT

Sasha Sethsen kajumissutsimik venturepilotitut suleqataasut ilagaat suliffeqarfeeqqamit Kaassassummeersoq, kajumissutsimillu venturepilotitut suleqataasut allat suliffeqarfimmillu ikorfartueqataasut allat peqatigalugit maajimi Nuummi nukappiaqqat meeqqanik inuusuttunillu nukittuneqqusaatsitsinissaannik pilersaarusiortut ikiorpaat.

Ulluinnarni Air Greenlandimi sulisarpoq, suliffeqarfiullu attaveqaqatigiinnermik sulisuisa ilagivaat. Attaveqaqatigiinneq pillugu suleqatiminik suleqateqarneq sungiusimagaluarlugu, ullormut pisussamut qilanaarsimaqaaq.

”Ullumikkut ataatsimoornerup misiginissaanut qilanaaqaanga. Pisut ingerlarngat eqqarsaatigileraangatsigu nutaanillu misililiilluta, taava ataqatigiinnerput pitsaanerulertarpoq suliffeqarfeeqqamullu tunniusimanerput annerulertarluni,” taama Sasha oqarpoq itisiliillunilu:

”Taamaattumik suliffeqarfeeqqami nukappiaqqallu suliat ingerlasarnerisa pitsaasuunissaasa inerisarnissaannut siunnersuutissanik tigussaasunik pinissara qilanaarisimavara. Tamatta assigiinngitsunik kinaassuseqarluta nukappiaqqat suliffeqarfeeqqami suleqatigaavut, tamattalu assigiinngitsunik periuseqarluta, tamattali anguniagaraarput nukappiaqqat angusassaannik ikiornissaat,” taama oqaluttuarpoq Sasha.

ATAATSIMOORUSSAQARSINNAANERPUT NUKISSAMIK TUNISISARPOQ

Sungiusaatit assigiinngitsut aqqutigalugit ineriartortitsisuuneq suunersoq peqataasut paasisaqarneruffigaat, suliffeqarfeeqqamilu tamarmik immikkut suliassatik suunersut ilisimaarinerulerlugit. Paasiuminarsarlugu GREATTALKS-imeersut Sonja aamma Carsten assigiinngitsunik periutsinik saqqummiipput, taakkulu suliffeqarfeeqqami kajumissutsimik venturepilotitut suleqataasut suliffeqarfimmillu ikorfatueqataasut suliap ingerlanerinut tullinnguuttunut atorsinnaavaat.

Kristine T. Heiselberg GrønlandsBANKEN-imit suliffeqarfimmit ikorfatueqataasutut ilaavoq, oqaluttuarporlu workshoppertoqarnerata kingorna nukappiaqqat pissutsinik isiginnittaasiat suliffeqarfeeqqamilu anguniagaat pillugit tusarnaarnerulerumallugit misigaluni. Kiisalu siunissami nukappiaqqat qiimmassarusullugit imminnullu upperinerulersikkumallugit qanoq iliorsinnaanerluni paasisimallugu.

”GREATTALKS-imeersut oqaluttuariaasiat suliaqartitsiniartarnerallu nuannertarami isumassarsinarlunilu nukappiaqqallu suleqatiginerisa pitsaanerulernissaanut qanoq iliorsinnaanersugut siunnersorluarpaatigut. Nukappiaqqat suleqatiginissaannut aalajangersimasunik siunnersorpaatigut immitsinnullu qanoq eqqumaffigisinnaanersugut nukappiaqqallu pikkoriffii, oqaasererusutaat pisariaqartitaallu qanoq eqqumaffigisinnaanerigut ikiorpaatigut.”

Workshoppimi anguniagaq pingaarneq nukappiaqqanik suleqateqarnermut tunnganerugaluartoq, taamaattoq Kristine isumaqarpoq tamanna aamma kajumissutsiminnik venturepilotitut suleqataasut, suliffeqarfimmit ikorfartueqataasut illoqarfimmilu suleqatigisat suleqatigiinnerannut aamma iluaqutaasoq.

”Uagut aamma ”inersimasut” nukappiaqqanik tapersersuisussat isumagineqarnerput iluaqaaq. Uaguttaaq aamma inersimasutut ataatsimoorussaqarsinnaanerput nuannerpoq, tamattalu suliffeqarfeeqqami suliaqarnitsinni iluaqutigisinnaavarput. Sulereerlunga qasullunga aggeraluarlunga qiimmallunga nukissaqarluarlungalu angerlarpunga,” Kristine oqaluttuarpoq qungujullunilu.

”GREATTALKS-imi upperalugulu suliarisartakkatsinnut tunngasunut tunniussaqarsinnaanerput nuannaarutigeqaarput; tassa oqaloqatigiittoqarluarnissaanik periarfissiineq suliniutillu/oqaloqatigiinnerullu pitsaasumik ingerlariaqqinnissaanut utimut tunniussineq.” Taama GREATTALKS-imeersoq Sonja oqarpoq itisiliillunilu:

”Oqaloqatigiinnitsinni pinnguarnitsinnilu suliffeqarfinnit ikorfartueqataasut, kajumissutsiminnik venturepilotit klubbimilu sulisut piumassuseqarnerat nukissaqarnerallu takullugu ima misiginarpoq nukappiaqqat suliniullu assut tapersersorneqartut. Pingaarnertulli aamma namminneerlutik pikkorissarusupput mentoreqatigiillu suleqatigiinnertik allanngorartikkusuppaat taamaalillutillu nukappiaqqat suli annerusumik ikiorsinnaanngorlugit.”

GREATTALKS-imut Mind Your Own Business-imi kajumissutsiminnik venturepilotitut suleqataasunik, suliffeqarfinnit ikorfartueqataasunik illoqarfimmilu suleqatigisanik ikiuerujussuarneranut qujanarujussuaq.