fbpx
Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

Suliffeqarfeeraq Kaassassuk Nuummeersoq RD Marketing Bureau-mut isumassarsinartumik pulaarpoq

Nukappiaqqat inuusuttut suliffeqarfeeqqamit Kaassassuk-meersut kajumissutsimik venturepilotitut suliffeqarfimmillu ikorfartueqataasut suleqatigisatik pingasunngornerit tamaasa fritidsklub Qinngorput-mi naapeqatigisarpaat, illoqarfimmi nukappiaqqanut inuusuttunut nukittuneqqusaatsitsinissamik takorluukkaminnik piviusunngortitsinissartik anguniarlugu. Nalinginnaasumik missingersuusiornerit, attaveqatigiinnissamut pilersaarutit pisussamillu ineriartortitsinerit allamut saannaveersaarluni sammineqartaraluarput, uanili pingasunngornermi allatulaaq suliaqarput, suliffeqarfiup ikorfartueqataasup RD Marketing Bureau-p nukappiaqqat inuusuttut suliffeqarfimmut pulaarnissaannik qaaqqusinera pissutaalluni.

Kaassassuk i Nuuk tog på inspirerende besøg hos RD Marketing Bureau

Pingasunngornermi ualikkut seqinnarissuugaa nukappiaqqat inuusuttut qilanaarlutik kajumissutsimik venturepilotitut suleqataasut suliffeqarfimmilu ikorfartueqataasut naapippaat, Nuup suliffissuaqarfiata qeqqani illorsuup marlunnik quleriiusup silataani, tassaniipporlu Nuummi suliffeqarfiit ussassaarutinik suliaqartartut ilaat. RD Marketing Bureau ualeq taanna qaaqqusisuupput suliffeqarfeeqqamullu suleriaaseq allanngulaarlugu suliaqarfiuvoq. Takkuttut qilanaarlutik pissangallutillu suliffeqarfimmut appakaapput.

”RD Marketing Bureau-mut suliffeqarfimmut pulaarnissatsinnut qilanaarsimaqaanga. Allamukalaarluni nutaanillu misigisaqarluni nuannerpoq.” Taama oqarpoq 15-inik ukiulik Aputsiaq suliffeqarfeeqqamit Kaassassuk-meersoq.

RD Marketing Bureau tikilluaqqusivoq

Suliffeqarfimmit ikorfatueqataasoq Nukappi Dahl Thorleifsen RD Marketing Bureau-p allaffeqarfiani quleriinni siullermiittumi tikilluaqqusivoq, ullullu ingerlanerani pisussat saqqummiullugit. Mediegrafikeritut ilinniarsimasuuvoq, grafikkinillu suliaqarnermi saniatigut suliffeqarfimmi produktionit nioqqutissaasivillu akisussaaffigai. Ullumikkut suliffeqarfiup suliarisartagai pillugit nukappiaqqat inuusuttut oqaluttuunnissaannut piareersimavoq. Nukappiaqqallu paasisaqarusullutik soqutiginnillutillu apeqqutaannut Nukappi piffissaqarluarluni akisarpoq. Grafikeritut sulinermi suliassat suleriaatsillu assigiinngitsut grafikerinngorniaraannilu suna piumasaqaataanersoq pillugit nukappiaqqat inuusuttut paasisaqarput.

Saqqummiinerani suliffeqarfeeraq pulaartoqarpoq, tassalu RD Marketing Bureau-mi pisortaq pilersitsisorlu René Olsen. Nukappiaqqat ilassiorpai, imminut ilisaritilluni taassumalu Nukappimit isumagilluarneqarumaartut oqaatigaa.

Nukappi ukiorpassuarni timersornerup iluani assigiinngitsunilu inuusuttut pikkoriffiinik piorsaasarsimavoq, inuusuttuaqqallu imminnut tatigineruleraangata nuannaarutigisarpaa. Suliffeqarfimmit ikorfartueqataasutut sulinerminut tamanna ingerlateqqippaa.

”Nukappiaqqat pulaartoralugit nuanneqaaq, soqutiginnittupilussuupput, suliavullu pillugit værksteditsinnilu maskiinat pillugit apersortupilussuupput,” Taama Nukappi oqaluttuarpoq nangillunilu:

”Maluginiarpara nukappiaqqat arlaannik tigummiaqaleraangamik aallussillaqqissupilussuusut, assersuutigalugu ilisarnaatertik logo passutileramikku malinnaaqqissaarlutillu soqutiginneqqissaarput, tamannalu takullugu nuannerpoq.”

Værkstedimut alakkarterneq

Nukappiaqqat qiimalluarlutik utaqqisinnaarpiaratillu suliffeqarfiup værkstedianukarput, tassanilu takusaat siulleq tassaavoq nerriverujussuaq killuisarfik inip qeqqaniittoq, atortorpassuillu nerriviup eqqaaniittut. Pingaartumik maskiinat printerisartut, killuisartut, allapalaarisartut laserimillu naqitsisartut nukappissanit soqutigineqaqaat, maskiinallu sumut atortarnersut apersortorujussuupput.

”Suliffeqarfimmut pulaarluni nuanneq, maskiina killuissut aallartittoq takugatsigu sukkaruloorpoq! Tassa torrak!”– taama oqaluttuarpoq 15-inik ukiulik Angutitsiaq suliffeqarfeeqqamit Kaassassuk-meersoq.

Nukappiaqqat atortussaq atorlugu suliaqarneq qanoq innersoq paasisaqarfigilaarniassammassuk Nukappip grafikerit suliaannik suliffeqarfeeqqamit Kaassassuk-meersut workshoppertilaarpai. Nerrivik killuivik kaajallallugu nukappiaqqat ilisarnaatiminneersut sinneruttut piiaqqissaartussanngorpaat – suliassaq ukkassinartoq naammagittarnartorlu, tassami kukkuallalaaraanni aallaqqaataaneertoqarsinnaammat.

”Nuannernerpaavoq nammineq uagut ilisarnaaterput passukkatsigu tujuuluaqqanullu printeriaannanngorlugu piareerlugu,” taama oqaluttuarpoq 13-inik ukiulik Jens suliffeqarfeeqqamit Kaassassuk-meersoq.

Nukappiaqqat namminneerlutik grafikerip ulluinnarni suliarisartagaanik misiliitilaarnissaat workshoppernermi anguniarneqarpoq.

”Allaannginnami nukappiaqqat ittoorunnaamisut kinaassusiilu allatulaaq aamma takuavut. Nukappiaqqat nutaavimmik misigisaqarnerat takullugu malugalugulu nuanneqaaq,” Nukappi oqarpoq.

Nukappip malugisinnaavaa nukappiaqqat paasigaat suut ilinniarnerminni periarfissarinerlugit iluatsissagaannilu suna piumasaqaataanersoq. Taamatullu paasisaqarnertik suliffeqarfeeqqami sapaatip akunnikkaartumik suliaqartarnerminni atorluarsinnaavaat.

”Grafikeritut ilinniagaqarluni periarfissat qanoq ittuunersut soorlumi nukappiaqqat paasisaqarluarfigigaat ilikkagaqarfigilluarlugulu. Isumassarsiaqarnermiit naammassisamik suliaqarnissap tungaanut aqqutaa ilikkagaqarfigaat. Nukappiaqqat nuannisaqaat, uangattaaq nuannisaqaanga.” Nukappi tulluusimaarluni oqaluttuarpoq.

Nukappiaqqat suliffeqarfimmut pulaarnermik kingorna paasisaqarnerullutik, atassuteqarluarnerullutik nukissaqarluarnerullutillu suliffeqarfeeqqaminnilu sukataarnerorusullutik angerlarput.

Suliffeqalernissamut aqqutissaq

Mind Your Own Business-imi programmip ilaatut suliffeqarfeeqqat sumiiffimmi inuussutissarsiornerup iluanut qaaqquneqartarput, Mind Your Own Business suleqatigalugu suliffeqarfittut ikorfartueqataasutut peqataasunut.

Suliffeqarfiit ikorfartueqataasut tamarmik Mind Your Own Business-imi peqataasunut nukappiaqqanut nukappiaqqallu suliffeqarfeeraataasa ineriartornerinut annertuumik iliuuseqaqataarusunnertik tamarmik assigiissutigaat, kiisalu nukappiaqqanut paasitikkusukkamikku taakkuninnga sulilersitserusuttunik suliffeqarfeqartoq.

“Mind Your Own Business inuusuttortagut periarfissittarpaat, takutissinnaanngorlugu tamarmik arlaannik tunniutassaqartut. Uagutsinnut pingaarpoq inuusuttut ilisimassagaat atuarfiup silataatigut aamma inuttut ineriartornermut periarfissaqarmat. Misigaarput Mind Your Own Business aamma inuusuttut ineriartornissaanut periarfissittaraat.” Taama oqarpoq René Olsen, RD Marketing Bureau-mi pisortaq.

RD Marketing Bureau-p suleqatiginera nuannaarutigisorujussuuarput, taakkumi suliaminnut pikkorilluarlutik tunniusimalluarlutillu sapaatit akunneri tamaasa nukappiaqqat suliaqarnerinik tapersersortarpaat suliamullu tunngatillugu inuttullu ineriartornerannik tapersorlugit pisarlutik.

Suliffeqarfeeraq Kaassassuk-meersut suliffeqarfeeqqaminnik ineriartortitsinerannik ajunngitsunik tamanik kissaappavut.