Unge drenge får hjælp til at sparke liv I iværksætterdrøm til Venture Camp
Nukappiaqqat inuusuttut 17-it sunngiffimmi ornittakani Qinngorput aamma Inneruulat-neersut namminneerlutik suliffeqarfeeraliaminnik aallartitsileruttorput. Arfininngorneq 20. November aallarnisaasut inuusuttut GrønlandsBANKEN-imi ininut kusanartunut ulapaarnissamut qaaqquneqarput, tassami ukioq manna Venture Camp siunnersorteqarfik GREATTALKS suleqatigalugit ingerlanneqarpoq.
Nukappiaqqat Carsten Olsen-imit Sonja Sørensen-imillu, siunnersorteqarfik GREATTALKS-imik piginnittunit, siunnersorneqarluarlutik suliffeqarfimmut isumassarsiamik majip tungaanut ineriartortinnissaannut ikiorneqarput. 2020-imili GREATTALKS assigiinngitsunik aaqqissuussisarsimapput Kalaallit Nunaannilu Mind Your Own Business inuussutissarsiornerup uliani ilisimasalittut suleqatigilerlugu, nukappiaqqat inuusuttut suliffeqarfeeraliornerini tapersersorlugillu pitsaasumik oqaloqateqartarnissaannik tatigeqatigiillunilu suleqateqartarnissaannik ikiorumallugit.
”Nukappiaqqat inuusuttut nalunaaquttap akunnerini sisamani nipaarlooriarlutik imminnut tatiginerulernerat takullugu assut nuannerpoq. Aperineqarpugut Mind Your Own Business suleqatigilerusunneripput. Ingerlaannarluta angerpugut. Tassami anguniagaat upperigatsigu pingaaruteqarmallu nukappiaqqat isaasa qiimmannissaat anguniassallugu,” Taama oqaluttuarput Carsten Olsen aamma Sonja Sørensen GREATTALKS-imeersut, nangillutillu:
”Venture Camp-ertoqarnerani suliffeqarfimmi sulinerup paasinissaata saniatigut takorluukkaminnik anguniagaqarsinnaanerannik paasitinnissaat anguniarparput. Suliffeqarfimmi pilersaarutit aalajangersimasut saniatigut aamma eqimattatut ataatsimoorsinnaaneq eqqartorparput,” Taama Carsten aamma Sonja nangillugu oqarput.
Inuusuttut nukittuut
Nukappiaqqat inuusuttut qulingiluat sunngiffimmi ornittakkami Qinngorput-meersut meeqqanut inuusuttunullu nukittuneqqusaatsitsiniarput. Inoqatitik paasitikkusuppaat inuusuttut aamma nukittuujusinnaasut. Tassunga aamma atatillugu inuusuttut inersimasutulli periarfissarissaartiginissaat kissaatigaat, unammersuarnernilu isiginnaartuuginnaratik peqataatinneqarusupput.
Venture Campimi unammillerneqarnertik aamma piumassuseqarluarlutik ingerlappaat naak amerlasuutigut aatsaat misigigaluarlugit.
”Assersuutigalugu ullumi HR & Økonomi-mi ilikkama ilagaat suliffeqarfeeqqatsinni aningaasaqarnitta qanoq aqunnissaa. Suut tamaasa ilikkanngilakka, kisianni paasisaqarluartorujussuuvunga, ” taama oqaluttuarpoq 14-inik ukiulik Lars sunngiffimmi ornittakkami Qinngorput-meersoq, nangipporlu:
“Mind Your Own Business-imi peqataanissannut aalajangerpunga pissanganarunartikkakku. Suliffeqarfeeraliorneq misilikkusukkakku. Venture Camp-imi ilisimasalinnut saqqummiinerput nuannernerpaavoq. Pissangagaluarlunga nuannisarpunga,” Lars taama nangippoq.
Atisat mutit inuusuttunut tulluartut
Sunngiffimmi ornittakkami Inneruulani nukappiaqqat arfineq pingasut inuusuttunut tulluartunik kalaalerpaluttortalinnillu atisaliorniarlutik aallartipput. Tassani tujuuluaqqamik talitalimmik ilusilersuissapput sanaartorlutillu, taakkulu illuttut paffiini Kalaallit Nunaata erfalasuanik allaqassapput saneraanilu allaqqassaaq ”Kalaallit Nunaat”.
Suliffeqarfiit illoqarfeqatigisat piumassutsiminnillu sulisut suleqatigalugit
Nukappiaqqat sapaatit akunneri tamaasa Royal Greenland, Rene Design aamma GrønlandsBANKEN-imeersunik kajumissutsiminnik venturepilotitut suleqataasunik suliffeqarfimmillu ikorfartueqataasunik suleqateqartarput. Tunniussaat annertoqaaq, nukappiaqqammi suliffeqarfeeqqaminni ineriartornissaminnik ilikkagaqarnissaminnillu periarfissinneqarput.
”Mind Your Own Business -imi peqataanera nuanninaaqaara. Nukappiaqqat namminneq isumassarsiaminnik ineriartortitsinerat pilersitsinerallu takullugu nuanneqaaq, taama oqaluttuarpoq Søren Bundgaard Kristensen, sunngiffimmi ornittakkami Qinngorput-mi suliffeqarfimmit ikorfartueqataasoq, taannalu nangippoq:
”Venture Camp-imi pikkunarnerpaavoq nukappiaqqat inuusuttut namminneq saqqummiinerat. Alliallattuusipput qungujulanerini taattuinilu takusinnaavara tulluusimaartut. Taannartaa torrageqaara,” taama Søren qungujulluni oqaluttuarpoq.
Inuussutissarsiornerup iluani ilisimasalittut suleqatigisavut kajumissutsiminnillu venturepilotitut suleqataasut tunniusimanerat pillugu Mind Your Own Business-iminngaanniit qujaffigerujussuarusuppavut. Majip tungaanut nukappiaqqat inuusuttut malinnaaffiginissaat qilanaaraarput, tassani Business Awards-imi angusatik saqqummiutissavaat.
