You are currently viewing Kalaallit Nunaani inuussutissarsiortut aamma inuinnaat nukappiaqqat inuusuttuaqqat aallarnisaanerat tapersersorpaat

Kalaallit Nunaani inuussutissarsiortut aamma inuinnaat nukappiaqqat inuusuttuaqqat aallarnisaanerat tapersersorpaat

Allagartat sungaatut suliassatut takorluukkanik allattorsimasunik imallit iikkami, allattarfissuarmi nerrivimmilu nivingapput. Nuummi suliffeqarfeerassaminnut  isumassarsiaminnik inerisaaniarlutik nukappiaqqat katersuussimapput. Aqerluusat allagartallu sungaatut suli amerlanerit tigummivaat. Taakkununnga eqqarsaatinik sunik tamanik allattuisarput, isumassarsiatsialaap nassaarinissaata tungaanut.

Nuannaarutigineqaqisumik Januarimi Mind Your Own Business Nuummi ammarpoq, tassami Tuborgfondet tapersersuisoralugu, Kalaallit Nunaani nukappiaqqat inuusuttuaqqat aallarnisaasinnaanerat piginaasaannillu ineriartortitsisinnaaneq periarfissinneqarmat.

Taamatut iliuuseqartarnerup siunertaraa, nukappiaqqat ilikkariartorfigisinnaasaannik neqeroorfiginissaat, taamaalillutik aallarnisaanermik suliaqarnermikkut suliamullu piginnaasaminnik nukittorsaanermikkut, ilinniagaqarnissamut suliffissaqarnissamullu periarfissaasunik pitsaanerusumik paasinnilersinnaaqqullugit.

Inuussutissarsiortut pikkorilluinnartut inuinnaallu kajumissutsiminnik suleqataasut suleqatigilluinnarlugit, nukappiaqqat inuusuttuaqqat nutaaliortumik eqqarsaatersussapput anguniakkamillu ilumut piviusunngorlutik sananeqarnerat takussallugu.  Pimoorusillutik suleqataasut akimorlugit suleqatigiinneq ingerlataqarnerup nakooqutigingaa, Kalaallit Nunaanni Mind Your Own Businessimi suliniuteqarnermi aqutsisuusoq (projektleder) Ivalu Nørreslet Rex isumaqarpoq.

”Kalaallit Nunaani inuusuttuni, piginnaasatigut arlaanut ilimanaateqaratarsinnaasut amerlaqaat. Allaanerusumik qinigassaqarluni ilikkariartorsinnaaneq aqqutigalugu taakkuninnga ilimanaataasinnaasunik atuilluni iliuuseqarnissamik  MYOB aallarnisaaqataavoq, tassani aallarnisaaneq  kajumissutsimillu suleqataaneq tasiortutullusooq ingerlaqatigiisillugit. Neriuppunga, nukappiaqqat nammineerlutik qanoq piginnaaneqarfeqqartiginertik ilimanaateqarfeqartiginertillu misigalugulu upperilissagaat – peqarpummi! Uangalu sapinngisannguannik iliuuseqarniarumaarpunga, aamma tamanna taakkunani imminermi upperileqqullugu”, Ivalu oqarpoq.

 

Kalaallit Nunaani peqatigiinnerit nukittuut

Kalaallit Nunaani inuinnaat aamma inuussutissarsiortut piginnaasaqarluartut piumassuseqarluartullu peqataallutik Mind Your Own Businessimik suleqateqarumanerat nuannaarutigalugulu qujamasuutigeqaarput. Uani suleqatigisatta taamatut ilusilimmik ingerlataqarnermik (program) sooq upperinninnertik nukappiaqqallu ineriartornerannik tapersersuiumanertik oqaluttuarissavaat.

VisioBOX Consulting suliffeqarfittut suleqataasutut, aaqqissuussinikkut suleqatigiinnermut ingerlatsisuussaaq suliatigut tapersersueqataalluni taamatuttaaq aqutsinerup niuernikkullu ineriartortitsinerup iluani piginnaasatigut. Illu siunnersuisoqarfik pisimasoqartitsinissanut annertuunut aqqutissiuisuussaaq; februarimi Venture Camp majimilu Business Awards.

Nukappiaqqanut inuusuttuaqqanut pitsaasumik isiginneriaaseqarneq,  qanoq piginnaasatigut arlaanut ilimanaateqarsinnaanermik qitiutitsineq, Michael Binzerip taamatut ilusiliilluni  ingerlataqarnermut upperinninneranut peqqutaavoq.  Taanna Nuummi illumik siunnersuisoqarfimmik piginneqataallunilu aallarniisuuvoq.

”Periuseq MYOB-mit atorneqartoq, pimoorusisumik nukappiaqqat ataasiakkaat ilimanaateqarfiinik suliarinnittoq ilutigalugu suliffeqarfinnik peqataalersitsisoq – tamanna upperilluinnarpara!”  

”Venture Campeqarnissamut qilanaaqaanga, tassanimi inuusuttut naapissavavut. Taakku ingerlaarnissaat uagullu sulinissarput aallartinneqassaaq, tassanilu peqatigiilluta pitsaasumik misigisaqarnissaq pilersissavarput.  Inuit katersuutsissinnaanissaat nukappiaqqallu suliffeqarfeeqqami sulinerannik tapersersuinissara  qilanaaraara”, Michael Binzer oqarpoq.

Illoqarfigisami suleqatigisatut Kommuneqarfik Sermersooq aamma klubbi NUIF taamatut nukappiaqqanut inuusuttuaqqanut pitsaasumik toqqissisimanartumillu atassuteqarneq pillugit tapersersuipput. Taamatut ingerlatsinerup nukittoqutigaa, inuusuttut aallarnisaanermik piviusumik suliaqarsinnaanerat. Jesper Madsen, Kommuneqarfik Sermersuumi  Atuarfinnut  – Ulluinnarnilu Neqeroorutinut Immikkootortaqarfimmi aqutsisuusoq isumaqarpoq.

”Uagut nunatut allatulli inuusuttaqarpugut, atuarfiup atuartitsissutillu assigiinngitsut siunertaannik paasinninniarnerminnut ajornartorsiuteqartunik. Uani suleqatigiilernermi inuusutut kajumissisinnissaannut periarfissat arlaqartut takusinnaavavut, inuusuttullu atuartitsissutit assigiinngitsut siunertaannik ajonannginnerusumik takunnissinnaalernissaat neriuginarpoq, piviusunngortitsineq iliuuseqarnerlu atuagarsornermut atassuserneqarpata,” Jesper Madsen oqarpoq itisiliillunilu:

”Uagut suliffeqarfiit atuarfiullu akornanni suleqateqarnerulerusuppugut, unalu aamma suleqatigiinnissamut uunga iluaqutaasussamik tapersiutaavoq. Tamanna inuusuttunut amerlanerusunut sapiissusermik, kajumissusermik namminersortutullu aallartinnissamut sakkussanik tunniusseqataasinnaavoq”.

Suliffeqarfittut siunnersuisutut GrønlandsBANKEN nukappiaqqanik inuusuttuaqqanik suleqateqarnermi aningaasalersuinikkut paasisimaqarluartutut tapersersuerusuppoq. Inuit suliaminnut ilisimasaqarluartut, nukappiaqqat ilikkariartornerannut suliffeeqqamilu sulinerannut tapersersueqataasinnaapput. Inuusuttuni piginnaasatigut ilimanaateqarfiit annertuut, taamatut ilusilimmik ingerlataqarnerup (program) aallarnisarsinnaagai Carsten Pedersen, bankimi allaffeqarfimmi direktøriusoq isumaqarpoq.

”Kalaallit Nunaani MYOB-ip pitsaasumik sunniuteqarsinnaanera upperaara, tassa taamatut ilusiliilluni ingerlataqarneq suleqatigiinnermik nukittuumik tunngaveqarmat. Arlalinnik peqataatitaqarneq nukittoqutaavoq, assigiinngissutsit suliamullu tunngasut arlaqarnerusut atuutsilersinneqartarmata”, Carsten Pedersen isumaqarpoq.

”MYOB-mut pimoorusilluta suliniaqataavut, taamatut ilusiliilluni suliaqarnerup siunertaa uagut ingerlakkusutatsinnut naleqqulluinnarmat. Kalaallit Nunaanni aningaasaqarnikkut ineriartorneq atasinnaasoq pilersikkusupparput, ilaatigut inuusuttut ilinniagaqarnerannik ilikkariartornerannillu suliaqarnitsigut. Pikkoriffivut atorlugit ikiussavavut, tassaasoq; ataasiakkaanut Kalaallillu Nunaannut tamarmut aningaasaqarnikkut nukittuumik paasinninnilersitsineq,” Carsten Pedersen oqarpoq.

Suliffeqarfittut siunnersuisutut inissiaatileqatigiiffik INI, suliamut ilisimasaqarluartutut nukappiaqqat inuusuttuaqqat suliffeqarfeeqqamik ineriartortitsinissaannut, pilersitsinissaannut sulinissaannullu  tapersersuerusuppoq. Taamatut ilusilimmik ingerlataqarnerup ingerlannerani, nukappiaqqat suliffeqarfimmut INI-mut, suleqatigiilluni suliassat qanoq suliarineqartarnersut misigiumallugu pulaassapput. Eqeersimaartumik inuiaqatigiinni akisussaassusermik  tigusiumalluni inissiaatileqatigiifik peqataajumavoq, INI-mi allaffeqarfimmi direktøriusoq Henrik Rafn oqarpoq.

“Nukappiaqqat imminnut tatiginerisa piginnaasaannillu nukittorsaanissaq ilimanaateqartorujussuartut isigivarput, tassa nukappiaqqat, niviarsiaqqanit saneqqunneqartutut immata. Katataasoqassanngilaq, tamannalu MYOB-p sunniivigeqataaffigisinnaavaa, tamatumunngalu peqataarusuppugut.”

“Inuiaqatigiinni inuit tamarmik imminnut tunaartareqatigiittuarnissaat INI-mi upperaarput, taamaattumik aamma isumaqarpugut, MYOB-p periusaa siunertaqarluartoq MYOB-llu akisussaaffiata iluani suleqatigiinneq allatigut pitsaasumik tuniluukkumaartoq neriuutiginarpoq,” Henrik Rafn  oqarpoq.

Mind Your Own Business-mi Kalaallit Nunaani suleqateqarnerit tulluusimaarutigaavut. Peqatigiilluta nukappiaqqat inuusuttuaqqat aallarnisaallutik suliaqarneranni asseqanngilluinnartunik misigisaqartissinnaavavut, inuttut suliamullu atatillugu ineriartorsinnaaqqullugit.

Annertusaanngitsummik aallarnisaaneq

  • 2010-miilli Mind Your Own Business suliffeqarfeeqqanik 52-nik aallartitsiniarnermi piginnaasatigullu ineriartortitsiniarnermi nukappiaqqanik 513-nik peqataasitaqalersimavoq. 2015-mi Kronprinsparrets Sociale Pris nersornaat tunniuttagaa, organisationimut tunniunneqarsimavoq.
  • Nukappiaqqat 13-niit 21-nut ukiullit Mind Your Own Businessimut ilaanissaminnut periarfissaqarput. Tassani nukappiaqqat suliffeqarfeeqqamik aallartitsiniarneranni, aallarnisaaniarneq qitiutinneqarpoq.
  • Nukappiaqqat niuernikkut piginnaasaat aalajangiussisimanerallu misilittarneqassapput, niuernikkullu piginnaasassanik naliginnaasunik pissarsitinneqassallutik. Akisussaassuseqalernissaannik anguniakkanillu piviusunik angusaqarniarneranni unammillerneqarlutillu kajumissaarneqassapput.
  • Mind Your Own Businessimut 11 milliuunit koruunit tikillugit, Tuborgfondet tapersersuisimasoq suleqatigalugu, ingerlatassaq piviusunngortinneqarpoq, aningaasaateqarfiup oqaluttuassartaani aningaasaliissutit annerpaartaasa ilaattut oqaatigineqarsinnaasoq.