Drengene bag Nukappissat stråler fra scenen til Business Awards i Nuuk
Natersuaaqqap tummarfissap aappalaartup, saqqummiivissamut aqqutissaq takutippaa tassanilumi nukappiaqqat Nukappissaneersut suleqatigiissimanertik pillugu oqaluttuassapput. Januarimiilli sapaatit akunneri tamarluinnaasa, suliffeqarfeeqqamik pilersitsiniarlutik namminivillu niuernermut isumassarsiaminnik piviusunngortitsiniarlutik sulisarsimapput.
Nukappiaqqat nerisassanik tuniniaavik ineriartortissimavaat, tassani nerisassat illinnarluinnartut inunnut hunnorujunut arlalinnut pisoqartitsinermi siullermi sassaalliutigineqarput. Ullumi ilikkariartorsimanertik ineriartorsimanertillu pillugit, qaammatini kingullerni qanimut suleqatigisimasaminnut venturepilotinut, suliffeqarfinnit ikorfartueqataasut, illoqarfimmi suleqataasunut, suliffeqarfinnit suleqataasunut dommerisullu ataatsimiititanut saqqummiissapput.
”Suliffeqarfeeqqamik aallartitsiniarnerup pitsaanerpaartaa aallarteqqaarnermiippoq, tassa Venture Campemiilluta nerisassanik tuniniaavissamut isumassarsiavut legonik sanagatsigit. Tassanimi takorloorsinnaasimavarput peqatigiillutalu ineriartortillugu, suliffeqarfeeqqami nioqqutissiornermik ilusilersuinermillu suliaqarsimasoq, 15-nik ukiulik Johny oqarpoq nangillunilu:
”Venture pilotinik suliffeqarfinniillu ikorfartueqataasunik suleqateqarsimaneq qujanarsimaqaaq. Pitsaasimaqaammi.”
Januarimi nukappiaqqat 70-nik isumassarsiaqarsimapput niuernikkut isumassarsiap pitsaanerpaap toqqarnissaata tungaanut: Nerisassanik tuniniaavik! Tamatuma kingorna suliffeqarfeeqqap atissaa ineriartortissimavaat, ilisarnaatissaa ilusilerlugu, tujuuluaqqat aningaasaliiffigitillugit, nerisassianik misileraallutik pitsaanerpaanillu toqqaallutik, kingorna sassaalliutigisimasaminnik.
Tamakku pisimasut tamaasa nukappiaqqat tulluusimaaqalutik Nuummi GrønlandsBANKEN-mi natermit qaffatamit saqqummiivissaminnit oqaluttuaraat, inimi igalaarsuartigut seqerngup qinngorsimasaani.
”Nuannerpoq pissanganarlunilu! Peqataasimanermilu pitsaanerpaaq tassaasimavoq, misigisanik nutaarpassuarnik tunisimagaminnga,” Tuuma 13-nik ukiulik oqarpoq, suliffeqarfeeqqamilu HR aningaasaqarnerlu pillugit suliaqartoq.
Ullormi aggersimasunut tamanut nukappiaqqat sulinerat pillugu filmi, takutinneqarpoq. John Hoffer veturepilotitut nukappiaqqat ingerlanerat tamaat, siunnersortitut siunnersueqatigisatullu tapersersuisuusimavoq. Nukappiaqqat ajukkugunnaarlutik tulluusimaaqalutillu Nukappissat pillugit inuppassuarnut sassarlutik saqqummiinerat takullugu tulluusimaarutigeqaa. Imminnut tatiginerulersimapput, oqarpoq.
“Takusinnaavarput, nukappiaqqat piginnaasaqarluartut. Timitalimmik naamassisaqarput. Misigisimavunga takusinnaallugu angusaqarsimaqisut. Veturepilotitut misigisaq nuannernerpaaq tassaasimavoq nerisassanik ooqattaarineq ullumilu Business Awards.”
“Nukappiaqqat suliffeqarfeeqqamik suliaqarnerminni uummaarissisimaqaat. Aqqutaa tamaat taakkununnga piareersimajuarsimavugut. Takorluugaqarsimaqaat, oqaloqatigiinnikkullu piviusunngortitsiniarneranni suleqatigisimavagut,” John oqarpoq.
Dommerisut ataatsimiititat kalaallit aallarnisaasartut inuussutissarsiortullu piginnaasaqarluartut, nukappiaqqat malinnaavigisimavaat ullumilu qaaqqusatut peqataallutik. Takorluukkamit tigussaasunik anguniaganngortitsisarnermut, nukappiaqqat immikkuullarissutut piginnaasaat Christian Keldsenimut qamuuna misigisaqarfiusimavoq, taanna VisioBOX Consultingimi utoqqaanertut piginneqataavoq ataatsimiititamilu ilaalluni.
“Nukappiaqqat, pikkorilluinnartuuvusi! Tamanna eqqaamassavarsi inuunissilu ingerlaneranut nassarlugu. Ingerlaarnissinni peqataasimasugut eqqaamatigut. Tassa aamma suli illuatungaaniippugut, upperilluinnaarpatsigillu!” Nukappiaqqanut oqalugiaammini oqarpoq.
“Uanga nammineerlunga neriniartarfimmik aallartitsiniarneq misilinnikuuara, nalunngilaralu qanoq maleruagassiaqartigalunilu allarpassuarneq nakkutigisassaqartigisoq. Taamaattumik aamma immikkut tulluusimaarutingaara, nerisassanik tuniniaavissamut isumassarsiarisassi piviusunngortinniarnerani qanoq pitsaatigisimanersi,” Christian oqarpoq.
Julia Knudsen Anuami siunnersuisuunerusoq Global Dignity Kalaallit Nunaat-millu aallarneeqataasoq aamma Anne Nivikka Grødem aallarnisaasartoq Greenlandic Foodloverimillu aallarniisimasoq aamma ataatsimiititami issiapput. Inuussutissarsiortut pikkorissut nukappiaqqat ilikkariartornerannik tapersersuerusunnerat Mind Your Own Business-mi tulluusimaarutigaarput.
Nukappissat suliffeqarfeeqqami sapiissusertik pimoorussinertillu pillugit diplomenik tunineqarput. Pilersitsiniarnerat aamma akunnerminni, venturepilotinik suliffeqarfittullu ikorfartueqataasunik suleqateqarusunnerat takullugit nuannersimaqaaq, Maria Kavita Nielsen, Mind Your Own Business-mi direktøriusoq oqarpoq.
“Ilissi nukappiaqqat maani Kalallit Nunaanni Mind Your Own Businessip ingerlataanik naammassisaqarsimasutut holdit siullersaavusi – sapeeqaasi torrallaallusilu. Akiuussimavusi qununnginnersilu takutissimallugu. Imminut akunnissinnilu qaffasinnerungaartumut nutaamut inissillusi kivitseqatigiissimavusi. Suliffeqarfiutersi piviusunngorput, piumagussilu suli annerulersinnaallutik – tamanna nalunngilarput. Upperaarput!” Maria nukappiaqqanut oqalugiaammini oqarpoq.
Tamanut qujanaq Venturepilotinut, GrønlandsBANKEN-mit INI A/S-miillu suliffeqarfinnik ikorfartueqataasunut, Kommuneqarfik Sermersuumut, suliffeqarfittut piginneqataasumut VisioBOX-mut aamma Tuborgfondet. Nukappiaqqanut Nukappissanik pilersitsiniarneq aamma nutaanik misigisaqartitsineq, inuttut inooqatigiinnikkullu aamma suliamut piginnaasaannik nukittorsaaqataasinnaasut ajornarunnaarsissivasi.
