Nukappiaqqat inuusuttut taakku siulliit isumassarsiaminnik 70-inik allattuersuataarsimapput, kingorna oqaloqatigiissutigilluarsimasaminnik, naggataagullu taakku akornanni ataaseq suliniutigissallugu toqqarsimallugu. Tassalu maanna tullinnguullugu nukappiaqqat inuusuttut taakku pinngortissavaat nerisassaarniarfinnguaq Nuummiittussaq suliffeqarfeeranngortissallugu.
Uumap suliutip Mind Your Own Business-ip periaasia Kalaallit Nunaanni suliniutigilersinnaanera siunnerfigalugu direktørerput Maria Kavita Nielsen marlussoriarlugu maanga periarfissanik paasisassarsiorluni angalasarsimavoq. Tamattalik qujamasuutigilluakkatssinnik Tuborgfondet-ip takusinnaalersimavaa taamaaliortitsinissaq tapiiffigissallugu qanoq iluaqutaatigissasoq, tasssa suliniutip piviusunngortinnissaanut tulluussarniarsimasarput assissaqarpasinngilaq.
Mind Your Own Businessimi periutsip, peqataajuarneq, ataasimooqatigiinneq aamma ilikkagaqarneq pilersittarpai. Taamaattuminguna Tuborgfondet-ip taanna suliniut aamma Kalaallit Nunaanni misilitassaqqimmat piviusunngortinnissaanut tapiissuteqarfigisimagaa. Taama oqaluttuarpoq Tuborgfondet-ip pisortaa Anne-Marie Skov.
“Una suliniut MYOB sivisoorsuarmik malinnaavigisimavarput, inuusuit namminneq piginnaasaminnik aamma saperutinnginnerminnik inerikkiartortitsisinnaammata, tassa nutaaliornissamut pigiliusserusunnermik aqqutissiuunneqartutut tunineqartarmata, pissarsiartillu namminneq suliffeeraliornissamut sulilernissamulluunniit atorsinnaalerlugit,” Anne-Marie Skov oqarpoq.
“Una suliniut inuusuttorpassuarnut iluatsilluinnartumik atorneqartarsimavoq, taamaattumillu uagut suliniut taannarpiaq atorlutigu, inuusuttunut allanut iluaqutissanngorluni siaruarnissaanut suleqataalersimavugut,” Anne-Marie oqarpoq.
Misissuinissamut piffissaqarnissaq pingaarluinnartuuvoq
Taakku misissuilluni angalasarnerit sisamat, suliniuteqarnerup aallaqqaataaniilli aallartilluarsimaneranut aalangiisuulluinnarput. Ukiup aappaata affaa sinnerlugu periarfissarisimavarput, nunap, kulturip, inuusuit taakkulu ilimaanaateqarfigisinnaasaasa paasinerulernissaannut. Inunnut piginnaasaqarluartunut atassuteqaatit pitsaasut pinngortissimasavut, ullumikkut uagutsinnut pingaaruteqarluinnartutut inissisimalersimapput.
Piffissaqarluarluni periarfissaasunik misissuisimaneq matumalu suliniutaasup Kalaallit Nunaanni tunngavilerluarniarneranut naliitsusimavoq. Taamatut iliorneq immikkuullarilluinnartuuvoq, taamaattumillu Tuborgfondet-p tapersersuinera annertuumik qujaniarfissaavoq.
Maanga tikittarsimanitsinni Kalaallit Nunaanni suliffeqarfiit inuinnarnit aamma kommunimit suleqatit qanimut suleqatigilluinnarlugit, uunga suliniummut periusissagut atortussagullu pitsaasut misissuataartarsimavagut. Mind Your Own Business-ip aqqutissiuunnissaanut taakku soqutiginnilluinnarlutik tapersersorluarsimammatigut qutsatissaqarfigeqaagut.
“Suliffeqarfinnit suleqatigisassat pitsaalluinnartut pikkorissullu Mind Your Own Businessip katersorsimavai, taakku ilisimasaminnik piginnaasaminnillu tunniussinermikkut projektimut tapersersuipput. Nuannerluinnarpoq, taakku suleqatingalugit Kalaallit Nunaanni nukappiaqqat inuusuit eqimattat siulliit, soqutiginnillutik aallarnisaanerminni takorluukkatik ineriartortillugit aallartilluareeraat takusinnaallugu,” Anne-Marie Skov oqarpoq.
Uuma suliniutip siunertaa tassarpiaavoq nukappiaqqat inuusuttut, toqqissisimasumik aamma allaanerulaartumik iliorluni ilikkagaqarnissamut pulatinnissaat, tassami suliffissamik aallarniiniarnermi nammineqqinnaaq isumassarseriataarsinnaanermik aamma allanik piginnaanernik pigeriikkaminnik toqqammavilersortinneqaramik. Taamaaliortinneqarnerup nukappiaqqat inuusuttut sapiissuseqarnermik aamma imminut tatiginerulernermik pigiliussinermik misigisaqalersissavai, tassa namminneq isumassarsiaminnik tigussaasunik timitaliisinnaallutik takusinnaalissagamikku.
Tassa Kalaallit Nunaanni suliffeqarfiit aamma inuinnaat akornanni inuit piumassutsiminnik suliniutillit (Venture Piloter) aalajaalluarlutik ikiuulluarsimagallartillugit, qulakkeerneqarsimavoq, nukappiaqqat inuusuttut suliniummut peqataanermikkut, suliniummut toqqissisimanartumik aamma piginnaaneqarluartunik ilusilimmik, nukissaminnik pigiliussitinneqarsimammata.
“Mind Your Own Business-p inuiaqatit suliffeqarfiillu suleqatigilluinnarlugit inuusuttunut ineriartortitsilluni ingerlataqarneq pilerinartoq pinngortissinnaalersimavaa. Kalaallit Nunaata kulturiani taamatut ilusilimmik periuseqarluni ingerlatsilernissap takunissaa pissanganarpoq,” Anne-Marie Skov oqarpoq.
Tuborgfondet inuusuit inuiaqatimik akornanni peqataanissamut aamma ataatsimooqatigiinnissamut nukissaqarneruleqqullugit suliniutinut suleqataasarluni tapiiuartarsimavoq. 1931-miilli aallartittumik taanna aningaasaateqarfik tapiisarsimavoq suliniutinut 15.500-nik amerlassusilinnut, tassuunakkut inoqatigiit ataatsimoornerullutik aamma imminnut tapersersoqatigiillutik pinissaat angorusullugu.
Uagut tulluusimaarutigalugu oqarsinnaanngorpugut maannakkut tassa Tuborgfondet suleqatigilluinnarlugu nukappiaqqat inuusuttut siulliit 13-iniit 21-inut ukiullit, Kalaallit Nunaanniittut suliffeqarfeeqqamik pinngortitsinissaannut periarfississinnaagatsigit, taamaalillutik Mind Your Own Business anersaaralugu namminneq pilerigisaminnut isummatik aamma piginnaasannguatik sakkugalugit timitaliinissamut.
Tuborgfondet-ip Kalaallit Nunaanni Mind Your Own Business-ip ingerlannissaanut aningaasat 11 mill. koruunit tapiissutigisimavai, tassa aningaasaateqarfiup taassumap oqaluttuarisaanerani, tassa aallartinneqarneraniit, tapiissutaasarsimasut anginerpaat assigalugit. Suliniutip ingerlanneqartarnermigut toqqammavigilluinnarpaa, misilittakkat iluatsilluinnarsimasut, tassalu 2010-minngaaniilli maannamut inuusuit hunnorujut arlallit nunami tamarmingaaneersut uninngaannaratik akuunerulersinneqarsimanerat.
