Nyt strategisk erhvervspartnerskab med GREATTALKS i Grønland
GREATTALKS inuussutissarsiornerup iluani ilisimasalittut Mind Your Own Business suleqatigalugu nukappiaqqanik Venture Camps-ertitsinissaminik pilersaarusiorlunilu aqutsillunilu ineriartortitsissaaq, nukappiaqqallu qaammatini arfineq pingasuni pilersaarusiukkamik ineriartortinneqassapput, tassanilu namminneerlutik suliffeqarfeeqqamik ineriartortitsissapput, pilersitsissapput ingerlatsissallutillu.
GREATTALKS-ip Mind Your Own Business-imut ilanngunnini nuannaarutigaa:
”Uagut GREATTALKS-imi pingaartilluinnakkatsinnik tunniussaqarsinnaanerput upperilluinnarparput. Tassalu paasisaqarusussuseq, oqaloqatigiinneq namminerlu piginnaasanik upperinninneq taakkulu tunngavigalugit eqqarsaatit, isummat kissaatillu piviusunngortinnissaat,” taama oqarput Sonja Sørensen aamma Carsten Olsen, GREATTALKS-imik piginnittut.
Oqaatigaattaaq Mind Your Own Business aamma GREATTALKS periarfissarpassuarnik pilersitsisinnaasut, ataatsimoorlutillu nukappiaqqat, kajumissutsimik venturepilotitut suleqataasut inuussutissarsiortullu akornanni suleqatigiilluarsinnaanissartik qularutiginagu oqarput.
Mind Your Own Business-imi pisortap pilersitsisullu Maria Kavita Nielsen-ip suleqatigiilerneq ilassilluarpaa:
”GREATTALKS-imeersut suleqatigilernissaat qilanaareqaara. Nukappiaqqallu siumut aallarnissaannik kajumissuseqalersillugillu isumassarsitissinnaassagaat qularinngilara. Taamaaliussagaanni suleqatigiilluarnissaq, oqaloqatigiilluarsinnaaneq tatigeqatigiinnerlu pisariaqarpoq, tamannalu GREATTALKS -imeersut piginnaasaqarfigilluarpaat”, taama oqarpoq Maria Kavita Nielsen.
